ЗÆД-МАРГЪ

Урсриу, саубазыр зæрватыкк 
Абадт цъыфдзасты уæлхъус. 
Уый ныр ифтыгъд у сæрфатыл — 
Уалдзæг ралæууыди, кус! 
Кус! Дæ быцъынæг дæр аскъуын, 
Цæгъд дæ гыццыл удæй арт. 
Зоныс: цас бумбули, цас хъуын 
Дæу хæссын хъæудзæни дард. 
Æмæ бацыдтæ дæ зиуы, 
Раст кæркуасæны цъæхтæй 
Нал фæцауæрдыс дæхиуыл, 
Иу ран дын æрæнцой нæй. 
Нал дæ ’ндавы, нал, дзынга дæр, 
Нал — гæлæбу, нал — дыдын. 
Ныр дæ цъелфытæ — зынгавæрд, 
Хурæй ратæхæг сырх тын. 
Ды кæйдæр хæдзары тыргъы 
Аразыс дæхицæн къæс. 
Не схæцы дæ цæст быдыргъыл, 
Фысым — Уастырджийы ’нгæс. 
Уæдæ райгæ кус, лæппынтæ 
Рауадз, мадиуæг сын кæн. 
Нæй хъыгдарæг дæу æппындæр, — 
Ды зæды сих дæ лæгæн. 
Мæн нæ уырны æмæ фехста 
Искуы исчи дердæм дур. 
Уæд... уæд дын æмбойны фестæд 
Иу æндæдзгæ цъыфы мур! 


1996 




Автор: ХЪОДАЛАТЫ Герсан