АБОН УАЛДЗÆГ КАРЗ ЗЫМÆГЫЛ РАХÆТДЗÆН...

Абон уалдзæг карз зымæгыл рахæтдзæн, — 
Бонахаст зæрдæвæндиаг рауæццæ. 
Хур æргъæвсæг мигъты ’хсæнты нал хæтдзæн, 
Донхæрисыл бур къуыпатæ рахæцдзæн, 
Малусæгыл цины худæг бахæцдзæн, 
Нал уыдзæни митыздух уад уасæццæ, 
Хуры тын æй сабыр тохы басæтдзæн, 
Хæхтæ æмæ мæсгуытимæ нал хæцдзæн, 
Бæлæсты рæдæнг базгуыты нал сæтдзæн, 
Салд цъитийæ худгæ цæссыг ратæдздзæн. — 
Загътон æз, фæлæ мæ ныхас адæрддзæф: 
Мартъи та йæ галиу митæм бахæццæ, 
Акуыддæртæ, ацыдæртæ, асæнтдзæф, 
Абæттинаг, ницуал та йæ басæтдзæн, 
Алкæй дуарыл сусæг-æргом бахæцдзæн, 
Зæронд лæгты пецты къæхтæм бабæтдзæн, 
Кæртмæ дæр сын хизыны бар нал дæтдзæн, — 
Ивгæ цæсгом алцæмæ дæр бахъæцдзæн...






Автор: ХЪОДАЛАТЫ Герсан