ИУ ХÆДЗАРЫ...

Ацы хæдзары мыл цыдæр æрцæуы 
Æмæ нал вæййын мæхи хуызæн дæр. 
Чидæр мыл комкоммæ хинæй фæцæуы, 
Чидæр мæ сусæгæй давы цыдæр. 
Нал мæ фембары нæ фынгæн йæ хистæр. 
Чызджытæ сисынц мæ фыдгой кæнын. 
Нал æй фæхатын: куывд у æви хист у, 
Уайынц мæ цæстытыл æви у фын. 
Сомы цы ’мгарæй фæкæнын, гъе уый дæр 
Аскъæры м ’артыл фыддæрагæн дон. 
Оххай, куыд иунæг дзы вæййын, куыд иунæг, 
Ницыуал вæййы æппындæр мæ бон. 
Ацы хæдзары æз ницы ыссарын, — 
Ахауы ацы хæдзары мæ кадæй. 
Уыцы цъæхдзаст чызг... Мæстæй мæ фæмары. 
Уырдыгыстæг мын мæ бынаты сбады. 
Ацы хæдзары æгъдæуттæй зæрдæцъæх дæн. 
Уынгмæ дзы, куывддонмæ цæуæгау, рацæуын.







Автор: ДАУЫРАТЫ Дамир