ОКТЯБРЬ

Ныххудти рæсугъд цард мæ райгуырæн Ирæй,
Куы ныззарыд хуымтæй комбайн,
Куы нызмæлыд быдыр мæнæуты æфсирæй,
Куы райдыдтам хорты æфснайын.
Рæвдаугæ, нæ быдыртыл акастæн сабыр,
Фæзынди мæм алы нæмыгæй Октябрь.
Куы райдайынц зарын заводон турбинтæ, 
Хъæбыс-хъæбыс фурдмæ куы фезгъорынц  дæттæ,
Куы фæкæнынц адæм кæрæдзийыл цинтæ, 
Сæрибарæй уынгты куы калынц цæхæртæ,
Куы вæййынц зæрдæрухс æндонау — хъæбатыр, —
Уæд зæрдæмæ арфдæр ныххизы Октябрь.
Куы фæхъазынц хъазты зæрдæрухс фæсивæд, 
Куы райдайынц чызджытæ цингæнгæ симын,
Куы фæкæнынц фыййæуттæ нард фосы ривæд,
Куы райдайынц куывдты нæ зæрæдтæ сидын, , 
Дзæбидыры сыты куы бакъуырынц сабыр, — 
Сæ цины ныхасы вæййы уæд Октябрь.
Куы свæййынц сæрибарæй ног фæлтæр уарзон,
Куы фæкæнынц ерыс фæскомцæдисонтæ, 
Куы ’рæмысы сидзæр йæ райгуырæн бонтæ, 
Куы бахъомыл вæййы æнæ мадæй фаззон,  
Цæрæнбоны чи дардта сау зæххæй дзабыр,— 
Сæ цæстытæй худы нæ уарзон Октябрь.
Хæххон чызг æвзæрсты куы радты йæ хъæлæс,
Лæппуты хуыздæртæй куы февзары мойаг,
Куы ’рлæууы йæ зæрдыл, йæ мад та æвгъæдгæс
Куыд бадти ыскъæты, куыд-иу уыд фыдбойнаг,
Уæд тынгдæр фæзæгъы æргомæй хъæбатыр: 
Мæ уарзæттæй уарзондæр у мын Октябрь.
Куы фæцæуы тохы сырхæфсæддон барæг,
Йæ худæй ыстъалы сырх зынгау æрттивгæ,
Октябры боныл йæ уарзондæр зарæг
Куы ныззары тохы, йæ нард бæхыл сиргæ, 
Ызнаджы цæвынмæ гæрзифтонг хъæбатыр,
Уæд зæрдæйæ дзуры: «Æгас цу, Октябрь!»

1937 аз.




Автор: БОЦИЕВ Барон