У ЛЕНИН — ЦАРД

Уыдис зымæг! Хæххон хъызт зымæг
Тъыфылтæй калдта зæххыл мит.
Ныргъæвстис æрдз æмæ фæтызмæг,—
Уад кодта хъæдбынтæй æхситт!

Мæ уарзон зæххыл мæты хъыгæй,
Цæй тыххæй барысти зæрдæ?!
Зымæгон арв йæ цæстысыгæй
Æхсадта салд зæххы фæрстæ!

Æмæ куыд нæ куыдтаид зæхх дæр, 
Зæххæн йæ фарндæттæг фæхъуыд!
Куыд нæ рызтаид хох-къæдзæх дæр,
Уый хохæй фидардæр куы уыд!

Куыд нæ тыдтаид зæрдæ мастæй,
Куыд нæ кодтаид зæрдæ хъыг,
Уый кæд æмæ нæ худгæ азтæй
Фæхъуыдис ног хуры фæрдыг!

Лæууы мæ зæрдыл æмæ зонын:
Уæд мæт æрхаста нæм Январь! 
Дыууын фыццæгæм масты бон ды  
Ныр кадджынæй дæ зæрдыл дар!
Уæд амард дунетæн саг фæтæг, — 
Мæгуыртæн чи радта сæ бар,
Кæй рухсæй рухсгонд у сæ фæндаг, — 
Уыдис уый Ленин — мах æхсар!

Ныртæккæйау лæууы мæ зæрдыл: 
Лæууыдтæн горæты уынджы,
Æмæ кæсын — йæ кæрцы тæрттыл,
Зæхмæ кæсгæ, хæххон хæцы...

Кæсын, æмæ зымæгон тъæнджы
Йæ цæстысыг бынтон фемæхст,
Йæ зачъетыл тымыгъ фæздæджы
Гæзæмæ их муртæ фæхæст!

Кæсын, æмæ кæрцы фæдджийæ 
Фæрсырдæм асæрфта цæссыг, 
Ныуулæфыд, ыстæй мæстыйæ
Фæхæссы рухс уынгты йæ хъыг.

Кæсын æмæ мæ хъустыл ауад,
Хъызт боны салдыл — фидар дзырд :
«Нæ фæтæг Ленин, нæ, нæ амард, —
Нæ мæлы ’гас адæмы фырт!»

Æмæ бæлвырд нæ амард Ленин,—
Нæй, дардæн никæд ис мæлæн!
Æз алы хъуыддаджы дæр фенын 
Нæ дуджы уый рухсы тæмæн!

Уый рахуыдта мæ бæстæ цардмæ, — 
Ыскодта мах дардæн бындур.
Фæхаста уый зæрдæты арфмæ
Æнусон амондæн йæ хур!

Æмæ бæлвырд дзыллæтæн рухсмæ
Уый Ленин сарæзта фæндаг!
Куыд нæ йын хæссой уæд æнусмæ
Сæ зæрдæты йæ конд хъуыддаг?!

У Ленин — ныфс, йæ тых нæ цардæн,
У Ленин — цард, цард у æнус,
Æмæ æнусон царды артæн
Мыггагмæ Ленин у йæ рухс!

14/1 — 39 аз.


Автор: БОЦИЕВ Барон