ОРДЖОНИКИДЗЕЙЫЛ ЗАРÆГ

(Йæ райгуырдыл 50 азы сæххæсты бонмæ)
Хæххон мæгуырты сырх худгæ хурæй
Ды ’фсæстай тохы, - фæтæг ды уыдтæ;
Сæ тохы боны ызнаджы мурæй
Ды куы ныууагътай,—фæдис ды ’рцыдтæ,
Гæрзарæхст-ифтонг, Серго—сырх бæхыл,
Бæхфæд бæрæг у Кавказы хæхтыл.
Кавказы хæхтыл, цъæх-цъæхид рæгътыл
Кæм нæ ахызтæ рæхсад æрчъиты?!
Кæцы лæгæты, кæцы сæрвæты
Ызнаджы фæдыл нæ хаттæ миты?!
Бæрзонд цъититы, бæзджын тар хъæды,
Кæмдæрид ардтай ызнаджы фæдтæ.
Уæд Ир — Цæцæнæй, Мæхъхъæл — Кæсæгæй
Хъæбатыр Серго кæм нæ уыд хæсты?!
Кæцы быдыры, кæцы æфцæгыл
Мæгуыры хъысмæт кæм нæ æмбæрста?!
Нæрыд йæ зарæг Дыгурæй Онмæ,
Цæгат Кавказæй уæд Хуссаргоммæ.
Гуырдзыстоныл дæр фæцыд йæ зарæг. 
Дзырдарæхст фæтæг Сырх Æфсадимæ,
Сырх Æфсадимæ тыхджындæр барæг, —
Серго цыд тохы ызнаджы риумæ.
Фæцæра бирæ хæххон ыстъалы,
Кавказы хæхты тæмæн чи калы.
Колхозон хуымты фæлмæн йæ тынтæ,
Фæлмæн йæ тынтæ ныр хур нывæнды,
Сергойы ’ххуысæй фæтæн быдыртæ
Бæрзонд хорæрзад гъе ныр фæдæттынц.
Колхозон зары йæ уарзон зæххæй,
Хуымтæ фæлдахы æндонриу бæхæй.




Автор: БОЦИЕВ Барон