НÆ АМАРД УЫЙ!

(М. Горькийæн)
Нæ мæ уырны, фæлæуу, нæ амард,
Æцæг фыссæгæн нæй мæлæн.
Йæ мæсыг нæу чысдурæй амад,
Æнусмæ дæр ын нæй кæлæн. 

Уый ахæм нæу, ыстæй нæ уыди,
Æрфæныфæдау у йæ фæд.
Лæджы сæр тохы бон кæм хъуыди,
Уым тохæй не ’здæхти фæсфæд.

Дæрзæг фæндæгтыл рахызт комæй,
Кæд урæдтой тымыгътæ уый?
Лæппуйæ базæрондмæ ’ргомæй 
Æрхаста дзыллæтыл йæхи.

Уæззау зæйты фæстæ тымыгътæ
Куы зылдысты, куы баргъæвст хъæд, —
Уæддæр дзырдта, — къуыбыр сæ хихтæ
Æфтаудзысты, ныннæрдзæн уад.

Бæлвырдæй уад ныннæрыд мигътыл,
Æрдуйæ снарæгдæр сæ фæд.
Цы зæхх, цы ком, цы хохы тигътыл
Сырх уалдзæджы нæ бахудт хъæд!?

Кæмæн нæ уыд ныхыйас хосгæрст,
Йæ гуыры фаг æрбадæн — зæхх,
Æлдарæн чи цыди-иу хъомгæс,— 
Кæй кой не’ркодта, уый мын зæгь?

Кæд денджызтæ ныххус уой сурыл,
Кæд зæрдæтæн фæуа сæ цин,
Кæд нал хæца лæджы цæст хурыл, — 
Æрмæст уæд амæлдзæн Максим! 



Автор: БОЦИЕВ Барон