МÆ РАЙГУЫРÆН БÆСТÆ

Мæ райгуырæн бæстæ, Советон Ирыстон,
Дæ мад дæ ныййардта нæуæгæй, уый зон.
Дæ хæхтæ, дæ хъæутæ, сæ тохы фæлыстæн
Сæхиуыл æркодтой æндонæй хæдон.
Дæ хæхты хъæбысæй фæлыгъдысты мигътæ,
Фыццагау дзы тухи, æфхæрддзинад нæй!..
Нæ цъититы хуылфæй кæд февзæрой ихтæ,
Уæд ницæмæй тæрсыс, цæттæ дæ гæрзтæй!
Тымыгъ боны фæстæ фæлмæн хуры тынтæй
Лæг тагъд айрох кæны фыд уады хъызын,
Фæлæ дæ рох ма уæд : фыццаджы фыдфынтæ,
Дæ рагон æфхæрд цард, дæ сусæг хъæрзын.
Æнхъæл-иу кæд уыдтæ, æлдары быдырты
Ныры хуызæн хиздзæн уæгъдибар дæ бæх?
Кæд федтай дæ фыны йæ ауæдз — къуыбырты
Дæ хъаруйæ, слæгъз кæндзæн ног цардæн, зæхх ?..
Дæ хъустыл ма уайдзæн: хъæдынцалх уæрдæттæн,
Сæхъыллист быдыртæй, сæцæлхыты ’мдзæгъд?
Дæ зæрдыл ма’рлæудзæн: Ирыстоны ’лдæрттæн
Дæ рустыл фæрсырдæм сæ ехсы æруагъд... .
Бын фесты фыдфынтæ, нæ марæг фыдфынтæ,
Кæй низæй мæгуыр лæг æмпылд æмæ тад, 
Уæд рагон Ирыстой, ызнаджы дзæмбытæ
Дæ фæллойæ истой сæ царды бæркад.
Рох ма фæкæн уыдон... Ызнаджы гæныстон
Мах хъуамæ ныккæнæм — бынтондæр хæрз мур!..
Цу размæ ныртæккæ, Советон Ирыстон, —
Дæу тавы фæллойгæнæг адæмы хур!
Æрвнæрæгау зарынц дæ заводтæ дардыл, 
Ыскалдтой, Ирыстон, дæ хæхтæ сæ фист.
Дæ цæуæт хи хъарынц рæсугъд хъæздыг цардыл.
Ныр, хурау, æрттивы дæ багеты хуызист.
Уæрæх у дæ фæндаг,
Хъæздыг у дæ фæззæг,
Дæ фадæттæ — бирæ, — трактор дын — бæх!
Цард уафы йæ зæлдаг фæлмæн тынтæ хъæлдзæг,
Мæ къæхты бын фидар — коммунæйы зæхх! 



Автор: БОЦИЕВ Барон