РЕСПУБЛИКÆ

Республикæ у ныр мæ бæстæ,
Æз та - йæ зарджытæн сæ куырд.
Мæхимæ райстон æз йæ хæстæ,
Йæ цин мæ зарæгæн - йæ гуырд. 
Республикæ у ныр мæ бæстæ,
Æз та - йæ хæстон, æз — йæ фырт. 
Йæ цин, йæ колхозон тыгьд фæзтæ —
Мæнæн мæ хуры хай, мæ дзырд.
Æз зардзынæн мæ бæсты кадæн, 
Республикæ уыдзæн мæ мад. 
Рæвдаугæ дæу, куыд чызг йæ мадæн, 
Кæндзынæн, Ирыстон, лæггад,
Цæмæй Республикты Цæдисы 
Æмрæнхъ цæуай, рæсуръд, æнгом,
Цæмæй уæлахиз цард кæм хизы, 
Фæстагдæр ма уа уым дæ ном.
Уæд дын зæгъдзæн нæ уарзон Сталин
— Дæ хъару бирæ у ’мæ рæз!
Тæхуды, уый фаг цин куы’ссарин, 
Тæхуды, уый аккаг фæрæз!
Тæхуды, арвыйас  уæгъд риу!
Нывæр нæ хурыйас  зæрдæ,
Дунеты ’рхон дæ зардмæ иууыл, 
Бæргæ, Ирыстон, о, бæргæ! 
Уырны мæ мæй, — уыдзæй сырх Ирæй,
Фæзындзæн ахæм фыссæг иу,
Кæмæн йæ зард нæргæ эфирæй
Æппæт бæстыл кæндзæн хæлиу, 
Зæгьдзæн ын мадау уæд мæ бæстæ: —
Зæрдæрухс амондимæ рæз!
Ды зоныс ног дугæн йæ хæстæ,
Дæ зард у адæмы хъæлæс.
Тæхуды, арвыйас уæрæх риу,
Йæ мидæг хурыйас зæрдæ:
Уæд дунетыл, мæ Ир, фæхæссин,
Дæ дин мæ зарæджы нæргæ. 




Автор: БОЦИЕВ Барон