БАЛЦЫ АРФÆ

Арв сæгъы цæстæй
У цъæх-цъæхиддæр, —
Уалдзæг ралæууыд ног мæ бæстæйыл.
Цард-цæлæфсæстæй
Ныр кæмдæриддæр
Адæм дин кæнынц царды рæстмæйыл.

Абон зæрдæйы
Мастæй ницы ис,
Уый Невайы был зары зарджытæ. 
Уарзон бæстæйы
Мах Ыстыр Цæдис
Тохмæ фервиты бирæ барджытæ.

Цæст кæм æфсæды
Уыдон уарзынæй,
Бæхтæн се ’хтæнгтæ фидар балвæстой.
Мах Сырх Æфсады
Ифтонг барджытæ
Ныр куы фæцæуынц хотых арæзтæй.

Бæхтæ — хорæфсæст, —
Хъазынц идæттæй, —
Уæд сæ хуыррыттæй уæлдæф баризы!
Арвæй хурыцæст
Калы 'рттивæнтæ,
Хур дæр хъармдæрæй уæнгты ахизы!

Уый Сырх барджытæ
Ныр куы фæцæуынц
Уæд Украины Хурныгуылæнмæ!
Амонд раттынмæ,
Уый куы фæхæссынц
Мах æфсымæртæн, тохы уылæнмæ!

Иу туг, иу стæг
Иу æфсымæртæн,—
Уыдон ратдзысты цард сæрибарæй!
Æз мæ риуыдзаг
Уæд Сырх æфсæдтæн
Ныр куыд нæ зæгъон бузныг фидарæй,


Ленинград, 1939 аз.

Автор: БОЦИЕВ Барон