АМОНДХÆССÆГ

Тымыгъ цары хъазыд, 
Фæскъул ниудта уад 
Æмæ уый дзыназын  
Иууыл хъустыл уад.

Ердойы зыхъыртæй 
Мит тъыфылтæй калд 
Æмæ йæ ныхъуырдта 
Ртхутæггæнæг арт.

Хъуыстон уыды ’хсæвты 
Карз æмæ хæстон 
Сахъ адæмы сæфты 
Аргъæудтæм бæстон:

—Иу хохы, мæ хуртæ, 
Ис æхгæд лæгæт.
Никæд уыдис уырдæм 
Бацæуæн лæгæн.

Баст æмæ æфхæрдæй 
Амыран уым цæры.
Сахъ лæджы игæртæ 
Сау дæргæрс хæры.

Адæмæн æвронджы 
’Рхаста арвæй арт.
Домдта ма сын ноджы 
Уый сæрибар дард.

Фæлæ йыл фæтых и 
Арвнæрынгæнæг.
Уымæн кæны тухи 
Сау зæххы зæнæг.

Фæлæ, зæгъынц, тондзæн 
Уый йæ рæхыс тагъд ' 
Æмæ нæ фæхондзæн 
Рухс бæстæмæ мах.

Æмæ уыцы аргъау 
Зæрдæмæ арф хызт,
Тахт æм фæндон маргъау, 
Зæрдæ цинæй рызт,

Саби æмæ сонтмæ 
Аргъау кастис раст,
Æмæ алы бон дæр 
Уый æнхъæлмæ каст.

Ныр Кавказы хæхтæй 
Рацыд уыцы лæг. 
Аргъæутты дзæбæхтæм 
Нал кæнæм хæлæг.

Райгуырд уæртæ Гуры, 
Райгуырдис æцæг 
Мигъты ныхмæ хурыл 
Адæмæн хæцæг.

Рæхыстæ ныссаста, 
Аппæрста сæ дард. 
Адæмæн æрхаста 
Амонд æмæ цард.






Автор: МАМСУРОВ Дабе

Другие стихи автора