КЪОСТА НЕМÆ ИС

Къоста дæр махæн немæ ис. 
Поэт кæны цæргæ.
Æрвылбон дæр ын фенæн ис 
Нæ даргъ уынгты цæугæ.
Цæуы, цæуы уый адæммæ,
У худæндзаст æдзух.
Зæрондæй, ногæй алкæмæ 
Дæтты йæ фæрныг къух. 
Кæддæр цы кæмтты ыстади, 
Уым цæуæнтæ — уæрæх.
Йæ фæдон тохмæ сыстади, 
Ысуæгъд кодта йæ зæхх.
Æмæ дзы ныр сæрибары 
Парахат хур кæсы.
Цæуы Къоста. Йæхи Нарыл 
Йæ цæстæнгас хæссы.
Йæ рæстæджы ам донвæрсты 
Æдæрсгæ лæг нæ цыд.
Ныр айнæджы æндон фæхстыл 
Фæтæн фæндаг фæцыд.
Кæм нæ уагътой лæбырд миттæ
Ызнæт доны цæуын.
Ныр уыцы ран ыстыр хидтæ 
Æфсæн хъæдтыл лæууынц.
Уыдис æнустæм Ручъы ’фцæг 
Хæххон лæгæн æргъом.
Фæзынд ыл ныр нæ дуджы фæд: 
Уыдзæн зымæг дæр гом.
Ам лæг æгас ком сауаздзæн, 
Æвæрдзæн дурыл дур.
Чысыл Захъадон сараздзæн 
Электрон тыхæн фурд...
Къоста кæсы: нæртон арты 
Æнæхъæн Ир фыцы.
Æрбадтис нæууыл. Ног цардыл 
Йæ ног кадæг фыссы.




Автор: ЦАГАРАЕВ Гиго