НЕМЫЦАГ ЧЫЗГ

Зæххы уæлцъар хæсты цæфтæй судзы, 
Арты пиллон хæдзæрттæм бырсы. 
Сармадзанты нæмгуыты рæмудзын 
Алырдыгæй арвнæрдау хъуысы.

Уынгты нал ис иу удæн ыссарæн,
Хъæу рæстæгмæ нал кæны цæргæ. 
Немыцаг чызг иу хæлддзаг хæдзарæй 
Тыгъд быдырмæ разгъордта кæугæ.

Алыг ис йæ мадæн уым йæ хъысмæт:
Сау нæмыг йæ зæрдæйы ныппырх.
Сиды, сиды сидзæр чызг æххуысмæ,
Мах салдæттæм сарæзта йæ ных.

Амондхæссæг салдат уый куыд фехса, 
Сабитæм егъау куы у йæ уарзт.
Акъоппæй йæхи цæргæсау фехста 
Æмæ февзæрд чызджы цур æваст.

Чызг ныттыхст йæ царддæттæджы риуыл, 
Цины цæссыг уадултыл лæсы...
Абон уый Берлины фæзтæй иуы 
Мах салдаты хъæбысæй кæсы.




Автор: ЦАГАРАЕВ Гиго