ÆНУСОН ЗАРДЖЫТÆ

Хорз зарджытæ, хорз рæнхъытæ 
Мин азтæм зæххыл æнхъæвзынц.
Гениты нæртон хъуыдытæ 
Дугтæй дугты онг æххæссынц.

Лæг æнусбонтæм нæ лæууы,
Банцайы æваст йæ зæрдæ,
Фæлæ баззайынц уæлæуыл 
Уый пахуымпарон хъуыддæгтæ.

Зæрдæйы куы гуыра зарæг,
Уæд уый хъуысдзæнис æнусмæ..
Талынг æм куы бырсы марæг,
У уæддæр йæ фæндаг рухсмæ...

Хорз зарджытæ, хорз рæнхъытæ
Никуы амæлынц, нæ сæфынц. 
Уыдон — гениты хъуыдытæ —
Рухсдæр фидæны ыстъæлфынц.. 




Автор: ЦХОВРЕБОВ Иван