ЦАРД ТОХ ÆЙ АЛКÆДДÆР

1

Цард тох æй алкæддæр,

Зонис, мæ хор, уой.

Хастон æй æз кæддæр,

Нур дæр æй ме ’ккой.

Æййевгæ цæунцæ

Нæ бæнттæ æнзтæй.

Дзиуæрттæн кæунцæ

Сæ муртæ мæстæй.

Дигори, арф коми

Байзадæй мæкъæс;

Цудтæн, цид, æз уоми

Ихуæрст -уæлигæс.

Бæгьнæг, фудигонæй,

Хастон сæр губур;

Баба фудæбонæй

Дардта-еу дзубур.

Сæрбæлхуæцæг, цома,

Цинæ адтæн æз;

Кæстæр, зæгъгæ, ома, -

Хестæртæ дин - дæс.

Мæ къæхтæн хуртæбæл

Калдæй, цид, сæ сурх;

Дарæстæ сунтæбæл -

Аллирдæмæ пурх.

Цъететæ, æфцгутæ

Сабийæн - уæззау;

Зæгьун уин æцгутæ, -

Зæрдæ уидæ сау.

Къолисæр хæдзари -

Уазал тъæригьос;

Нæ фæнзтон æз хъали,

Хуæрдæн - дзоси кьос!

Финстон, цид, фунуки

Æнгулдзæй æдзох;

Мæ листæн - фуд руги,

Н ’адтæн незæй цох.

Кадæнгæ кæнидæ

Зæронд баба сах;

Уой цагьдмæ мæ фидæ

Инæфидæ: «ах».

II

Цудæнцæ нææнзтæ,

Ирæзтæн æз дæр;

Райстон уæд мæ гæрзтæ,

Уæззау хастонсæр.

Гъой, гйаур, зиндонæ,

Зиндонæ ’й нæ хонх;

Æхсæвæ, æд бонæ

Цард - алкæддæр тох.

Нирристæй нæ догæ,

Базмалдæй дуйней;

Ка ’дтæй æнæ когæ,

Гъей,зин бæнттæ, гьей!..

III

Силгоймаг, зæрæндтæ

Адтæнцæ æфхуæрд;

Фудмиутæ, хæрæнттæ

Æвзурстан мах уæд...

Балхадтан нæ барти

Нæ тогæй мах, ох!..

Æзнæгтæ ’махъалти

Кæндзинан нур цох.

Нæ догæ растадæи

Райгьалæй нæ хонх;

Сæребарæ мадæ ’й, -

Гъæуй уобæл тох.

 

Автор: БЕСАЕВ Тазрет (Тазе)