ДЗИЛЛИ НИВÆН

Цъæхсæрти хурфи бамбурдæнцæ

Нæ кизгуттæ ’ма нæ лæхъуæнтæ,

Сæ хъалдзийнадæй - устур дæнцæ,

Раст цума æнцæ тæхгæ мæргьтæ,-

Цийнæйдзаг æнцæ фæтæн реутæ.

Цурд син исцагъта рæсугьд кизгæ,

Рæсугьд æвзагæй, рæсугъд хъурæй,

Борæмæлгьи цагьд æ фæндурæй:

- Нæ хор гъардæрæй кæбæл кæсуй,

Мæйрохс ирддæрæй кæмæ ходуй,

Маргъау, уæлдæфи ка фæттæхуй,

Кæсалгау накæ ка фæккæнуй,

Хæсти æзнагæй ка нæ тæрсуй,

Кусти раздæрбæл ка фæууодуй

Знаги æдбунтæй ка басæттуй? -

Уой мин зæгьетæ, нæ фæсевæд! -

Фæсевæд кизгæн дзуапп дæттуй:

- Нæ хор гъардæрæй махбæл кæсуй,

Мæйрохс ирддæрæй махмæ ходуй,

Уæлдæфи маргъау мах фæттæхæн

Æзнагæй хæсти ку нæ тæрсæн -

Æхе зæнхи мах уой басæттæн

Фал дæ мах, кизгай, ку бафæрсæн,

Уаз нин фæндурæй радтæ, гьеуæд!

- Хори дуйнебæл ка раивта?

Уоййау æ тунтæ ка байтудта,

Мæгур, æфхуæрддзиллитæбæл,

Денгиз, полюстæ, сау зæнхæбæл.

Æ ном æносмæ ка ниууагьта

Цитгин, бæрзондæй хорзæринау

Æгас дуйней адæмтæбæл?!

Уой нин, хуарз кизгæ, ду иссерæ! -

Кизгæ исцагьта зæллангдæрæй,

Рæсугъддæр хъурæй æ фæндурæй:

- Уой уин зæгъдзæнæн, хъал фæсевæд:

Нæ хорæй хордæр Ленин адтæй,

Хорау æ тунтæ йе байтудта

Нæ мæгур, æфхуæрд дзиллитæбæл,

Денгиз, полюстæ, сау зæнхæбæл,

Уомæн æй уарзæн уотæ берæ!..

- Амондгун исуай, дзæбæх кизгай,

Лæхъуæнти хуæздæр фæууа дæ хай.

Æцæг æй Ленин хори æнкъай,

Æ ном æносмæ йе ниууагьта,

Цитгин бæрзондæй хорзæринау

Æгас дуйней дзиллитæбæл.

Адæм зæрдæбунæй уой уарзунцæ,

Уой зунд адæмæн устур нифс æй,

Адæмæн фарнæ йе равардта,

Уой фæрци ку ан игъæлдзæг - хъал.

Æгас адæмти дессаг лимæн, -

Æ ном байзадæй дзилли нивæн,

Цъæх зæлди хурфи бамбурд æнцæ

Сæ устур кувдмæ нæ гъæубæстæ -

Кæстæр, хестæртæ, мæхе æстæ, -

Нæ кизгуттæ ’ма нæ лæхъуæнтæ,

Цийнæйдзаг æнцæ фæтæн реутæ.

Сæ хъалдзийнадæ - устур дæнцæ...

Нæ рæсугъд кизгæ рæсугъд хъурæй

Итингдæр цæгьдуй æ фæндурæй.

Фæрсаг кæнунцæ æмхузонæй -

Кæстæр, зæрæндтæ, мæхе æстæ,

Фæрсаг кодтонцæ и фалдзæстæ-

Нæ будуртæ ’ма нæ бæлæстæ.

 

Автор: БЕСАЕВ Тазрет (Тазе)