БИНОНТИ ЦАРД

Ханбекер æма Ханиффæ,

сæ сунтой дæр ма сæ хæццæ,

сæ дæлбазур æрбадунцæ —

хорискастæй хорæфтудмæ

кæрæдземæ фæдздзорунцæ;

ци нæ хæссунцæ сæ сæрмæ,

сæ фурхилтæй исхуарунцæ

сæ кæрæдзей сæ сæтæй.

Ку сæ фæрсай, ци кæнунцæ,

уæд рæуæнттæ фæккæнунцæ,

сабур цæрунмæ, косунмæ

сæ синхонти нæ фæнзунцæ,

багъигæ’й си сæ хæссæг дæр,

фæндæ кæнун ин зонунцæ.

Ниссæ уадзуй сæ фæрсæг дæр,

нæ фæммæлуй сæ мæтæй.

Кустмæ цæугæй сæ хæссæг лæг

бæргæ фæууй хъæбæр цæрдæг, —

нæ фæндонбæл ку низзаруй —

æ цæсти суг æрæгъзалуй,

фæззæгъуй, цид, ци дессаг æй,

атæ кæугæй цæмæн зарун?

Æвæццæгæн мæ низзарун

мæ рист зæрдæн кæун æй.

Уотæ заргæй ку бакосуй —

силти загъдæй ку фæттæрсуй,

фурæстонгæй æнæбари

æрæнцайгæй æ хæдзари,

фæсси ледзуй фурæфсесæй;

ка нæ ледзуй уæхæн тохæй,

фæззæгъуй, мæ куст феронхæй,

рафунæй уй æрхунæй.

Æгуст æнцæ сæ кустæгтæ,

æдзæттæ’нцæ сæ рæфтæдтæ,

сæ биццеутæ, сæ кизгуттæ

ци уинунцæ, уой кæнунцæ.

Ци кæнонцæ? Фурæстонгæй

сæ кæрæдзей, сæ мадтæлтау,

цъæхахст гæнгæй, нихæй тонгæй,

агайунцæ дæндагæй.

Сæ куй ма дзи ку ниннеуй,

уæд сегасей гъаер ку сеу уй, —

æрæмбурд унцæ синхонтæ

сæ фæдесмæ, сæ дессагмæ.

Æрæхсæвæ уй уалинмæ,

неугæ-рæйгæй, берæгъбалау.

‘Ма сегасдæр ниххуссунцæ

мæстæйдзагæй, фæлладæй...

Автор: БАГРАЕВ Созур