Хæхбæсты, фыдбæсты æз бадын æнкъардæй,
Мæ уынгæг сагъæстæн кæрон нæй æппын:
Дзыллæйы фыдмитæ, къæйныхæй, æнадæй
Ныццæнд ысты хивæнд зæрдæйы рæбын...
Бын бауай, нæ дзыллæ, бын бауат, æмгæрттæ,
Мæгуырты куыд ничи уæ скодта æвгъау!
Цæсгом дæр уын нал ис: нæмынц уын уæ фæрстæ.
Уæ арв æмæ зæхх уыл нызгъæлæнт фæлтау!..
Хъæбæр баст рæхысæй, — уынут æй уæ цæстæй,
Былмæ уæ фæтæры, æиæвгъау, ызнаг...
Чермеиы хорз зарæг нæ хъуысы уæ фæзтæй...
Цæрын ма æмбæлы ныр афтæ æнад?!.
Ныууадз, дам, дæ хæдзар, ныууадз, дам, дæ мады,
Цæугæ, дам, нæ разæй, дæу бахъуыд хæцын!
— Кæимæ мæ лымæн? Иæ арм нæм чи дары
Нæ мæгуыр сидзæртыл, гъе, уыдон цæгъдын?!
Куыд сайут дзыллæты æрттивгæ пъагонтæй?!
Куыд тæхут, фырцинæй, уæлвонгты сымах?
Æрцæуы ныл афон... Кæлдзыстут бæрзондæй, —
Кæсут ма Цæгатмæ — уым тынг у гæрах!..
Автор: БАРАКОВ Гино