УÆЛÆ ХЪÆДЫ ÆРСЫТÆ
Уæлæ хъæды —
Æрсытæ,
Æрсытæ.
Симынц, симынц
Æрдузы
Æрсытæ.
Саст бæлас сын —
Нæртон фæндыр
Æрсытæн.
Тутт бæлас сын —
Тъупп-æмдзæгъдæн
Æрсытæн.
Симынц, симынц
Реуа симдæй
Æрсытæ.
Сирынц, сирынц
Фæрсмæ сирдæй
Æрсытæ.
Рувас та сæм
Кæцæй бафтыд-
Рубæга?
Симды астæу
Цæмæн бады
Рубæга?
Афтæ æнкъард
Цæй тыххæй у
Рубæга?
Йæ цæссыгтæ
Цæмæн калы
Рубæга?
Бадзурынц æм:
- Ралæуу не ’хсæн,
Рубæга!
Айс-ма афтæ
Мæ дзæмбы,
Рубæга!
- Симдмæ та мæ
Цæмæн хонут,
Æрсытæ?
Ауадзут мæ
Мæ хуыккоммæ,
Æрсытæ!..
Рувас симын
Нæ фæзоны,
Æрсытæ!..
- Мах дæ сахуыр
Кæндзыстæм,
Рубæга!
Мæнг дзурынмæ
Дæсны куы дæ,
Рубæга!
Уæд нын симын
Куыд нæ зоныс,
Рубæга?
Цуанæттæн нæ
Фæнымыгътай,
Рубæга!
Фæхъуыдыстæм
Æ рс- хуыздæрæй,
Рубæга!
Нæ буц хистæр
Арсæмæджы,
Рубæга,
Ныууæй кодтай
Рæстдзæвинæн,
Рубæга!
Нæ буц кæстæр
Къуыбылеццы,
Рубæга,
Ныууæй кодтай
Ды сырддонмæ,
Рубæга, —
Уæд нын симын
Куыд нæ зоныс,
Рубæга?!
Мах дын æрс-тох
Бацамонæм,
Рубæга!
Бафтыдтой йæ
Тымбыл симды
Æрдузы.
Айвазынц ын
Йæ къабæзтæ
Æрдузы.
Йæ дымæг ын
Æрыскъуынынц
Æрдузы.
Йæ фæрстæ йын
Бацъæл кæнынц
Æрдузы.
Райстой дæ ныр
Сæ рагон маст,
Рубæга!
Мæнгардæй сыл
Цæмæн цыдтæ,
Рубæга?
Уæлæ хъæды —
Æрсытæ,
Æрсытæ.
Симынц, симынц
Æрдузы
Æрсытæ.
Саст бæлас сын —
Нæртон фæндыр
Æрсытæн.
Тутт бæлас сын —
Тъупп-æмдзæгъдæн
Æрсытæн.
Автор:
ЦАРУКАЕВ Владимир