КÆЛÆНЫ НЫВÆФТЫД
Гъæйтт мардзæ, диссаджы заман æрæфтыд:
Рудзынджы авгыл — кæлæны нывæфтыд,
Сайы æвзистхуызæй митурс тыгьдад.
Уадзы йæ мондаг тыхдымгæ кæрæфæй,
Хъæд æмæ æрхыты пъæззы ныббадт.
Цæй-ма, цы знаг та нæ зæххыл ыссырд и?!
Цъиуы бын гагатæй урс мит ныссырх и,
Туджы æртæхтæй та — Хуссар, Цæгат.
Раст цыма зæйты бын фидыд ныппырх и,
Фегуыдзæг кусæг — æгуыст у, æгад.
Удæн цы зын у тызмæджы æртхъирæн:
Ихдзагъд бæлæстау сты мадæлтæ Иры,
Тоны мæ зæрдæ сæ сагъæссаг маст.
Быдырты фынтæ сты хоры æфсирыл —
Уым та фæхъусын нæ зынгхуыстты хъаст.
Судзынц йæ базыртæ фидауц бæллицæн,
Барджыны намыс æфсармæй фæхицæн.
Царды æмудцзинад халæг — хæрам,
Домы хуымгæнæгæй фиддон йæхицæн,
Тугæй — æфтиæгтæ, бартæй — гæртам.
Гъæйтт мардза, диссаджы заман æрæфтыд:
Ауæй кæн намыс; кæрæфдзинад — кад.
Кусæг — нывондаг, фæтæрынц æй сæфтмæ,
Адæмы цæстытыл — ихы нывæфтыд,
Адæмы къæсæртыл пъæззы ныббадт...
Автор:
БРИТАЕВ Асланбек