МÆ ХО ДИБÆХАНÆН...
"Мæ хо Дибæханæн"...
Нæй равдисæн цæссыг æмæ ныхасæй
Нæ хъыгæн, у æнæкæрон нæ маст:
Кæстæр уæвгæйæ ды цæуыс нæ разæй,
Куыннæ кæнæм дæ хъысмæтæй уæд хъаст?
Кæуæг нæ мардыл нал уыдзæн дæ фæстæ,
Нæ мады зæнæг — бафснайдтай дæ сæр.
Кæд баззадысты ‘рдæгфыстæй дæ хæстæ,
Куыд дæ рахонæм аххосджын уæддæр?!
Дæ цардвæндаг куы уыдаид дæхи бар,
Уæд нын нæ зæрдæ не скъахтаид рис.
Цы бакæнæм! Æвæццæгæн, сæрибар
Кæддæр заманы нал фæдæтты низ.
Дæ фæндтæ дын ныппырх кодта, ныкъкъуыхтæ,
Æнæхъæнæй дзы нал ныууагъта иу.
Æгæр раджы дын басаста дæ тыхтæ,
Æгæр раджы дын баууылдта дæ риу.
Дæлдзæхмæ лæг нæма ныххызт æвыдæй,
Нымад мæлæтмæ никуы уыди кар.
Цæуыс нæ кæд, мыййаг, æнæрæвдыдæй,
Уæд нын — хатыр, нæ рæдыд нын ныббар.
Автор:
ДЗАСОХОВ Музафер