ЦИНЫ БАЛЦ
Куы ссæуы фæллад зæрдæ хохмæ,
Фæлгæсы фæйнæрдæм зыдæй,
Куы хъусис фырцинæй йæ «ох»-мæ,
Уæд сæрст вæййы бæстæ мыдæй.
Сæры хъуын
Дымгæ фæйлауы,
Доны хъæр
Риуæй цæуы,
Хæхты уынд уды рæвдауы,
Цин зæрдæ
Хъусæй лæууы;
Рæгьтæн уырдыгмæ сæ миттæ
Донимæ заргæ цæуынц;
Хур-мæ нæ лæууынц,
Æхситтмæ, -
Хæхтыл
Сæ сæртæ цæвынц.
«Рацу нæм»,—
Курынц мæ рæгътæ,
Малусæг кувы ныллæг,—
«Фен нын мæйрухсы нæ дæгътæ,
Ардæм нæма цæуы лæг...»
Комы ныффæлдæхт
Дынджыр къæй,
Цъититæн
Цъиры сæ сой.
Малусæг тауы
Фæлмæн тæф —
Уалдзæгæй фехъуыста кой.
Куы ссæуы
Фæллад зæрдæ хохмæ,
Фæлгæсы фæйнæрдæм
Зыдæй:
Куы хъусис фырцинæй
Йæ «ох»-мæ, —
Нæ зæгъис
Дæ цины
Дзырдтæй.
Автор:
ФАРНИОН Коста