ХУДУТ, МÆ ЦÆСТЫТÆ
Судзут, мæ цæстытæ, судзут,
Зæрдæйæ исут цæхæр.
Адæммæ уарзонæй худут,
Доны куы зилат, уæд дæр...
Зæрдæйæн фестут кæсæнтæ, —
Дзыллæ йæ феной æргом.
Масты сын — доны лæсæнтæ,
Цинты сын — уалдзыгон бон...
Зæгъгæ мыл абон æрмæйдар,
Мисхал дæр не ’ркæнин мæт:
Исты кæнин æз куырмæн дæр, —
Дзыллæтæ худæндзаст уæнт...
Судзут, мæ цæстытæ, судзут,
Зæрдæйæ исут цæхæр.
Адæммæ уарзонæй худут,
Доны куы зилат, уæд дæр.
Райсин уæ дунейы уæрцы,
Фæлæ уæ раттин лæвар:
Уадз æмæ минтæн уæ фæрцы
Д1а уа сæ цæстырухс тар...
XI. 77.
Автор:
КОЗАЕВ Исидор