Дессаг, дессаг, куд федауй
Нæ бæхбадæг æ бæхбæл!
Мæнæ цума зинг фелауй
Бæрзонд хонхи къæдзæхбæл!
Æнзтæ бæнттау нæма цæуй,
Уайуй,уайуй нæ догьон.
Ка ни цæруй, ка ба кæуй...
Кæуæг мæхе куд хонон?
Рæвдзæ гьудæй нæ догьони
Цæфхæдтæ’ма идонæй.
Нæ курд райста уой æхемæ,
Искодта сææндонæй.
Гъенур нæ бæх догьи уайуй,
Æфсес æй е нæ хуасæй.
Кæд ма надбæл ехтæ уаруй,
Уæддæр цæфхад сæ тас æй.
Исгьазуй нур нæ бæхбадæг
Нæ догьонæн æ уæле;
Е æй бæлвурд дзæбæх бадæг,
Уæхæн бæх ба кæмæн йе?
Цурд æй нæ бæх, догьи цæугæй,
Æ цæфхæдтæ - æносон;
Цард нæ уарзун мæ куст лæугæй, -
Фæуун æз дæр æ хъозон.
Дессаг е æй, куд федауй,
Хори тунтæй нæ кьæдзæх!
Æтуруса ниффелауй
Нæ догьонæн нур дзæбæх.
Автор: БЕСАЕВ Тазрет (Тазе)