Ци гьæуй мæн?
- Зæрдæ, зæрдæ!
Нифсæй æнхæст,
Тогæй сугьдæг-
Хъаурæгин зæрдæ!
- Еунæг? -
-На!
Ке ци фæндуй, уой зæгьæд,-
Мæнæн еунæг зæрдæ нæй æнгьæд!
Нæ хуæнхтæй, нæ адæмæй уин кæнун соми:
Куд мæ уарзт,
Уотæ
Мæцийнæ ’ма мæмаст
Сæ фæндон нæ фæццæунцæ уоми...
Къæхтæ, кьохтæ, гьостæ ’ма цæститæ
Дугæйттæ дæр уæнтæ,-
Мæ фагæ *нцæ.
Фал зæрдæ? -
Æцæг лæгæн
æ зæрдитæ
Мингий дæр уæддæр
Гъæуамæ уонцæ
æртæ.
Гъема æцæглæгау
мæн дæр гьæуй
Раст гьеуал зæрди.-
Сæ еу уонæй
хорау тæхдзæнæй
хуæнхтæ, гьæдтæ *ма
арф денгизтæн
сæ сæрти.
Рæстдзийнадæ, уарзт
æма лæгдзийнадæ
Æвæлмæцгæй итаудзæнæй
Адæмæн се ’хсæн...
Иннæ?
Лæмбунæгæй
банимайдзæнæй уони:
Ка уа хæран,
калмау æтоги
Адæмæн ка хæсса
кæлæн æма
мæлæт.
- Нæ зæнхæй
хæран адæнти
Дæлзæнхæмæ фехсæн!-
Уодзæнæй уомæн
Дзилли рази æ загьд.
Æма, дуйнебæл
Сæребари цардæн
Æма мадæн
Æзнагæй цидæр ес,
уони
Æ нæртон æхсаргардæй
кæронмæ
Никкæндзæнæй бундзагьд...
Ме ’ртиккаг зæрдæ
æносмæ
цæрдзæнæй
æригонæй мæ реуи:
Мæ гьолтæ,
Мæ хæтæл,
уæлигæси хизинæн -
Цардæй уодзæнæй
Æвдесæн.
Æма
Берæ хæтти
Бæрзонд къæдзæхи
сæрæй
Мæ гьостæбæл
уайдзæнæй
Фиййауи хæтæли зæлланг!
Мæхуæдæг нæуæгæй
бæхбадæг уодзæнæн
Гарнæгони бæхæн
æма
Арви кæрæнтти
балцитæ кæндзæнæн
Мæ зæрди
дзæбæхæн!..
Ци гьæуй мæн?
- Зæрдæ, зæрдæ!
Нифсæй - æнхæст,
тогæй - кæдзос,
Хъаурæгин зæрдæ,
Сæрустурæй
Кæми гьæуама хæссон
Райгураен бæстæн
Амонд, рохс æма
æхсицгонæй
нæ уарзт,
Цæмæй æгас дуйнебæл
Мауа:
Нæ сон, нæ æлгьистæ,
Нæба
Тухмаст!
Автор: БЕСАЕВ Тазрет (Тазе)