Æнсувæр, хуæрæй уарзун фулдæр,
О хор, сугьзæрийнæ, æз дæу!
Цæй, цæй, тагьддæр ракæсæ нур дæр,
Дæ тунтæй бафсæда нæ гъæу.
Уарзун, ку ракæсис бæрзондæй,
Тунтæ ку раскъæрис фæндон,
Дæ гъарæй æ цъæх ех фæсонтæй
Ку солæфуй дзæбæх нæ дон.
Цъететæн ку райхалис сæ худ,
Зæнхæку солæфуй дæуæй.
Цъæх кæрдæг ку ферттевуй рæсугьд
Игуæрдæн гьæугæрон нæуæй.
Уарзун, хор, сау гьæдæ дæ фæрци
Ку скæнуй дарийтæй фæлуст,
Ку рагæлдзуй нæ фиййау æ кæрци,
Хуймон ку райдайуй æ куст...
Лæварæн ку радтис нæ цъеутæн
Хæтæлау зарунмæ гьæлæс, -
Устур уй æ цийнæ мæ реуæн, -
Цъеуи зар бафæнзун уæд æз.
Фæззæги бор мæнæуæ хъурæй
Ку фæкковуй дæуæн ниллæг,
Нæ фæттæрсуй зæрдæ мæгурæй,
Тогбæл раскьунуй нæ тиллæг...
О хор, сугьзæрийнæ, дæ тунтæй
Нæ фагæ рарветæ махæн -
Гъей-гиди, дæу хæццæ хæтунтæй
Уæгæ кунæ уайдæ къахæн, -
Ку уайдæ мæн бон дæр дæу хузæн
Адæм, зæнхæн пайда хæссун,
Райгурæн нæ уайдæ лæгьузæн,
Тухсти нæ кæнинæ тæрсун. -
Мæ зунд, мæ фæллойнæ ’ма мæ уарзт
Адæмæн дæдтинæ æз уæд,
А зæнхæй фесафинæ æз маст,
Фæнзидæ дæу, хор, нæ цæуæт!..
Æнсувæр, хуæрæй уарзун фулдæр,
0 хор, сугьзæрийнæ, æз дæу! -
Цæй, цæй, тагъддæр ракæсæ нур дæр,
Дæ тунтæй бафсæда нæ гьæу!..
Автор: БЕСАЕВ Тазрет (Тазе)