Цæйтæ, нур радтæн
кадæ ‘ма æгъдау
еумæйаг мæрдтæн.
Ке фæрци махæй
райхалдæй туххæй
не’носон бæдтæн.
Махæн нæ надбæл
одесæн бонмæ
ка не’сфæлмæцтæй.
Махæн рохс цардбæл
не’знæгти къохæй
арти ка ‘сфунхæй.
Æ тог, æ бауæр
ка снивонд кодта
мæгурти сæрбæл.
Цардæн æ оундор
ка’рæнгон кодта
йе ндон æстæгбæл.
Йе’стуггин реутæ
ка’ринсун кодта
мæнги курæнтти.
Йе’надæ цардбæл
ка’вдесæн кодта
æвзарæн бæнтти.
Тохгæй бæгъатæр
ка’рбацæуидæ
фудгинти фатмæ.
Зæгъæн син рохсаг,
зæгъдзæй син æй, цид,
рæстади фарнæ.
Кæнæн син соми, —
мах дæр ке уарзæн
раст царди адæ.
Мах дæр ке федæн,
цæугæй сæ фæдбæл,
адзали радæ.
Автор: БАГРАЕВ Созур