Деникинæн йæ фæсдзæуин, —
уыдон кæнгæ булкъон,
нæ цъулберты хæрз æмдзæрин!
Цы зын дын æскодтон?
Хæдмæл лæджы æмбырсæгау
дæ пъагонты мастæй,
мæнгæвдисæн æххуырсæгау
цæмæн мæ бавдыстай?
Кæд хæдзардзины 'мбаладæй
æхцатæ басайдтон,
уæд мыгстытау, æмбырд кæнгæ,
цæмæн сæ фæфыстон?
Кæд мæн æмдзæвгæты смагæн
никæй фындз бабыхсдзæн,
уæд ахуырады хайадæн
æстыр рæдыд уыдзæн.
Кæд ды дæ ахæм æвзагæй
коммунист æрбадæ,
уæд мæхуызæн æмбалæй
хъæбæр æнæ 'мбал дæ!
Автор: БАГРАЕВ Созур